روس ویلسون شارژدفیر

سفیر روس ولسون د ۲۰۲۰ کال د جنوري په ۱۸مه، د افغانستان اسلامي جمهوریت لپاره د متحده آیالتونو د شارژدفیر په توګه کابل ته راورسید. د څلور لسیزو په جریان کې د متحده آیالتونو د ډیپلومات په توګه، هغه د ۲۰۰۰ څخه تر ۲۰۰۳ کال پورې په اذربایجان کې او له ۲۰۰۵ کال څخه تر ۲۰۰۸ کال پورې په ترکیه کې د سفیر په توګه دندې ترسره کړي او وروسته یې په ۲۰۱۴ کال کې په ترکیه او بیا د ۲۰۱۸ کال څخه تر ۲۰۱۹ کال پورې په جورجیا کې د شارژدفیر په توګه دندې پر مخ وړې دي.

له ۲۰۱۰ څخه تر ۲۰۱۴ کال پورې، سفیر ولسن د اتلانتیک شورا د یوریشیا مرکز رییس و، چیرې چې هغه د ترکیې، پخواني شوروي دولتونو، او سیمه ایزې انرژۍ، اقتصادي او سیاسي او ادغام مسایلو اړوند د شورا د چارو مشري کوله او په استانبول کې یې د انرژۍ او اقتصاد کلنۍ غونډې تنظیمولې. سربیره پردې، نوموړی په نړیوالو چارو کې په واشنګټن ډي سي کې د جارج واشنګټن پوهنتون د نړیوالو چارو افتخاري لکچرر یا استاد دی او د ګلوبل مینیسټا او د ترکیې مطالعاتو انسټټیوټ د بورډ او د نورو هغو غیر انتفاعي سازمانونو د مشورتي شوراګانو غړی هم پاتی شوی چې د نړیوالو چارو په برخه کې فعالیت کوي.

له هیواد څخه بهر، سفیر ولسن په مسکو او پراګ کې د متحده آیالتونو په سفارتونو کې خدمت کړی او د آسټرالیا په میلبورن کې قونسل جنرال و. هغه له ۱۹۹۷ څخه تر ۲۰۰۰ کال پورې د پخواني شوروي اتحاد د نویو خپلواکو دولتونو لپاره د متحده آیالتونو د بهرنیو چارو وزیر ځانګړی سلاکار او په لویه کچه د سفیر اصلي مرستیال و. هغه د متحده آیالتونو د بهرنیو چارو وزارت د بیلابیلو وزیرانو لکه جیم بیکر، لارنس ایګلبرګر او وارن کریسټوفر سره د اجرایوي سکرتر مرستیال په توګه هم دنده ترسره کړې ده؛ د بهرنیو چارو وزارت د مرستیال وزیر، رابرټ زولیک د دفتر رییس؛ د امریکا د ازادې سوداګرۍ سیمې لپاره د متحده آیالتونو د خبرو اترو مشر په توګه پاتې شوی دی؛ او د بهرنیو چارو وزارت په هغو دفترونو کې یې هم کار کړی چې د شوروي اتحاد او مصر هیواد اړوند چارې پر مخ بیايي.

سفیر ولسن له مینیسوټا پوهنتون څخه د لیسانس او د کولمبیا پوهنتون او د متحده آیالتونو نشنل وار کالج څخه د ماسټرۍ سندونه ترلاسه کړي دي. نوموړي د متحده آیالتونو ولسمشر څخه د ستاینې وړ خدمت جایزه، او همدارنګه د متحده آیالتونو د بهرنیو چارو وزارت څخه بیلابیلې جایزې او ویاړونه ترلاسه کړي دي. ښاغلی ولسن د امریکې ډیپلوماسۍ اکاډمۍ؛ د امریکا د بهرنیو خدمتونو اتحادیې، د متقاعدو ډیپلوماتیکو او قونسلر افسرانو ادارې؛ د واشنګټن د بهرنیو چارو انسټټیوټ؛ او د اوکلاهوما د چاکټو ملت په څیر سازمانونو کې غړیتوب لري. ولسن له مارګو سکویر سره واده کړی، چې میرمن یې هم د متحده آیالتونو د بهرنیو خدمتونو تجربه لري.