د امريکا د سفارت مرستيال ډونا ویلټن

ډونا ویلټن له ۲۵ کلونو راپدېخوا د ډیپلومات په توګه دنده ترسره کوي چې د نړۍ په بیلابیلو هیوادونو کې یې د امریکا متحده ایالتونو په سفارتونو او قونسلګریو کې د ستراتیژیکو اړیکو او سیاسي چارو په کلیدي پوسټونو دنده ترسره کړې دي. نوموړې د ۲۰۱۹ زېږدیز کال په اګست کې کابل ته راغله چې له هغې وړاندې یې د درې کلونو لپاره د فنلنډ په هیلسینکي کې د امریکا په سفارت کې د ماموریت د مرستیالې مشرې او د ۱۸ میاشتو لپاره د شارژدافیرې په توګه دنده ترسره کړه.

په فنلنډ کې د دندې ترسره کولو مخکې، هغې د امریکا متحده ایالتونو د دفاع وزارت په دفتر کې د پالیسۍ په برخه کې د سهیل ختیځې اسیا لپاره د سرپرستې مشرې په توګه په موقت ډول دنده ترسره کوله. اغلې ویلټن خپل کاري ژوند په ۱۹۸۴زېږدیز کال کې د امریکا متحده ایالتونو د مالوماتو په اداره کې پیل کړ او په ۱۹۹۲ کې له ښوونځي څخه د فراغت لپاره د بېرته راګرځېدو څخه مخکې یې په اسیا کې په درېیو پوسټونو باندې کار کړی دی. هغې د پرینسټون اسیایي هنرونو او لرغون پوهنې په ډیپارټمنټ کې د دوکتورا د کورس پایته رسېدو او دوکتورا اخیستو وروسته، د هنرونو مرکزي موزیم کې د جاپاني هنرونو د متصدي په توګه کار کاوه او وروسته یې په نیویارک کې د امریکایي هنرونو فدراسیون کې د نندارتونونو متصدي په توګه دنده ترسره کړه.

اغلې ویلټن په ۲۰۰۰زېږدیز کال کې د امریکا په بهرنیو چارو وزارت کې بېرته بهرنیو خدمتونو ته راوګرځېده، چې په دې لړ کې یې په ټوکیو، ناګویا، واشنګټن، او جاکارتا کې د عامه ډيپلوماسۍ په پوسټونو او د جاپان په ساپورو کې یې د جنرال قونسل په توګه خدمت ترسره کړی دی. د اردو د جنګ کالج کې په ستراتیژیکو مطالعاتو کې له ماسټرۍ اخیستو وروسته، هغه په کابل کې د عامه چارو مستشار په توګه وګمارل شوه چې له دې دندې یو کال وروسته د ملګرو ملتونو لپاره د امریکا ماموریت کې د یو کال لپاره د اړیکو او عامه چارو مرستیالې مشرې په توګه دنده ترسره کړه. اغلې ویلټن د ۲۰۱۳زېږدیز کال په جون میاشت کې جاپان ته د عامه چارو لپاره د وزیر مستشار په توګه وګرځېده او د ۲۰۱۵زېږدیز کال تر اګست پورې په دغه دنده پاتې شوه. هغه په جاپانۍ ژبه روانې خبرې کوي او په کوریایي، اندونیزیایۍ، الماني او څه نا څه یې په دري او فنلنډۍ ژبو کې هم زده کړې ترسره کړې دي.

اغلې ویلټن د نیویارک د شمال په کلیوالي سیمه کې زېږېدلې او لویه شوې ده. نوموړې بهر ته له سفرونو، انځوراخیستنې او پخلي سره لېوالتیا لري.